پیاوبون لەنێوان ژن و دایکیدا

کاتێک کوڕ خوای پێ ناکوژرێت، واتا بە ویستی هێز توانای دەستبەسەرداگرتنی سۆزی دایکباوک و هەڵوەشاندنەوەی گرێی ئۆدیبی نییە، ئەوە هەمیشە وەک منداڵێک دەمێنێتەوە، بۆیە ئەوکاتەیشی هاوسەرگیری پێکدێنێ، ئەو ئەویترە گەورەیەی لە پانتایی واقیع سێکسی لەگەڵدا دەکا هەمان وێنای دایکەکەی منداڵی خۆیەتی بەشێوەیەکی سیمبولی و بە ئەویتری بچوکی لە پانتایی خەیاڵیدا.

لێرەوەیە ژنەهاوسەرەکەی بەهۆی مێردەمنداڵێکی ناباڵادەست هاوشێوەی باوکێک زێیە تێرنەبوەکەی پێ نەخەسێنراوە، ئەم بۆشاییە دەبێ بە مایەی زوتر بینین و چاونەپۆشین لە خەوشەکانی ژیانە هاوسەرییەکەیان، بەوەدا بۆخۆی دەبێ بە خەسێنەرەکە بەسەر مێردەمنداڵەکەیدا.

لەکاتێکدا دایکە یەکەمینەکەی کوڕەمێردەکە چاوی لەوەیە بە ڕێی کوڕە (خەساوە)کەیەوە بوکەکەیشی بخەسێنێت، کەچی خەساو پاڵ بە ئەویتر بدا خەسێنەری لێ بەرهەم دێت، بەو مانایەی مێردەمنداڵەکە وەکچۆن لە منداڵیدا دایکی بەسەرخۆی بەرەو خەساندنی پاڵداوە، جارێکی تر بە گەورەییش دوبارە ژنەهاوسەرەکەی وەک دایکەکەی بەرهەم هێناوەتەوە.

لێرەدا ئەم دژایەتییەی بوک و خەسو بەو هۆیەوە ڕودەدا کامییان خاوەندارییەتی لە خەساوەکە (سۆزەکەی ناوەوەیان/دەرونییان) بکەن، لەبەرئەوەی بوک بە باڵادەستیکردنەکەی سۆزی بۆ مێردەکەی وەک منداڵێکی خۆی (دەرون بەزەیی بە ژێردەستەدا دێتەوە) پەیداکردوە، لە هەمان کاتیش بۆتە گرفتی دەرونی بۆ خەسوەکەی (سۆزەکەی ناوەوەی/کوڕەکەی)، بەوەی بە خەساندنی مێردەکوڕە ژێردەستەکەی هەڕەشەیە بۆ دایکە سەرەکی و یەکەمینەکەیشی (بۆ خستنە دۆخی بەزەیی پێهاتنەوە) و ئاماژە بە خەساندن و ژێردەستەکردنی ئەویش سەرەڕای (دایکێکی باڵادەست و خەسێنەری کوڕەکەی خۆیەتی) خاوەنی زەکەری ئایدیالییە دەدات.

بە پێچەوانەوە ئەو کوڕەی گرێ ئۆدیبەکەی هەڵدەوەشێنێتەوە و سۆزی دایکباوکی تێدەپەڕێنێت وەک کوشتنێکی خوا، دەبێتەوە بە باوک (فالیک/ئەوەی هەیەتی/مێردی دایک)، دواجار دەبێ بە باوک بەسەر هاوسەرەکەیشیدا، بۆیە (بەم جۆینە) هاوسەرەکەیشی وەک خەساو (دەرونکەوتو)ێکی لێدێ بەرانبەر بە خەسوەکەی هاوشێوەی دایکێکی خاوەن زەکەری ئایدیالی و کچێکی خەساو.

کەواتە بوکەکە و خەسوی بەتەنیا دوژمنێکی یەکتر نین، بەڵکو لە ناوەڕۆکدا (ئەوانیش بە بۆنەی گرێی ئەلێکتراوە) دۆستێک و حەزیشییان لە یەکترە، لەسەر ئەو بنەمایەی کوڕەمێردەکە وەک پردێک دو خەسێنەری بەسەرخۆیدا جۆین و لێک بەستۆتەوە، ئەوەش بەرهەمهێنانی هۆمۆسێکسواڵیتەی ناڕاستەوخۆی ژنانەی (گرێی نێرینەیی لە ژندا بە هۆمۆسێکسواڵیتەی ژنانە کۆتایی دێ. فرۆید) لە نێوان بوک و خەسوەکەیدا لێ دەکەوێتەوە.

هیوا سەعید