چۆن لە منداڵبونەوەی نیچەیی گەورە ببینەوە؟
بێژن: چییە ئەوەیی منداڵ دەیتوانێ و شێر نایتوانێ؟ ئەو شێرە ڕفێنەرە دەبێ ببێتە منداڵ؟
عەشق پانتاییەکە تەواوی دالەکانی ناوی بەهۆی ئۆبێکت(بابەت)ی ئارەزوەوە کە ئەویش شا - دالێکە، بون بە خاڵی هاوبەشی یەک و یەکتر دەنوێننەوە. ئەم یەکتری نواندنەوەش مەدلولی وەکو ئەویتری بچوکێک (شوێنگرەوی دایکباوک، بە مەبەستی دەستبەسەرداگرتن و خاوەندارییەتی لێکردن/هاوسەنگبونی دەرون) لە پانتایی خەیاڵدا وەرگرتوە و ڕەمزاندوییەتی. لێرەوەیە بە لەناودابونی دوبارەی ئەم پانتاییە سۆبێکت ئاشنا و چالاکانە درێژە بەخۆی دەدات.
بە پێچەوانەوە لە ئەگەری لەدەستدانی ئەم ئۆبێکتی ئارەزوەدا وەک چیتر یەکانگیرنەبونی نەست و ئەویتر(ئۆبێکت)ەکەی، سۆبێکتیش لەم نێوانە لەناو پانتاییەکە لەبەر ناچالاکبونی (خەرجنەکردنی لیبیدۆ/خاوەندارییەتی بەسەرخۆنەکردن) دوچاری کەرتبون دێت، بەوەی کەرتێکی ئیگۆ (ئاگایی/شێر) هاوشوناس دەبێتەوە بە ئید/بە نەست وەک وشترێکی ملکەچ و کەرتەکەی دیکەی دەبێتە سوپەرئیگۆ (ئەویتری ئۆبێکت) و چاودێرێک بەسەرییەوە.
لێرەدا ئەم ناچالاکی و هاوشوناسبونەوەی کەرتێکی ئیگۆ بە ئید، لەبەرئەوەی ئیگۆ لە ڕازینەبون بەم جۆرە سۆبێکتەی پەسەندی ناکا وەک خۆڕەتکردنەوە و نەفییەک، لە کاردانەوەیدا سوپەرئیگۆش ئەم نەفی و ڕازینەبونەی وی لە خۆخاوەنداریکردن ڕەتدەکاتەوە وەک نەفی نەفییەک (منداڵبونەوە/بەڵێی پیرۆز)، ئەوە دەبێ بە زاڵبونی نەست (نائاگایی)، توانای ئاگا لەخۆبونەکەی (خاوەندارییەتییەکەی بەسەرخۆی)، چونکە ئیگۆئاگایی سەر بە پرەنسیپی واقیعە وەک لە واقیع دابڕانێک لەدەست دەدا، ئەم ئاگا لەخۆنەبونەش (ناخاوەندارییەتی لە خود) نەمان و هەڵنەگرتنی سۆز بۆخۆی (نەمانی پەیوەندی ناوەکی/نائاساییش و ناسەلامەتی) لێدەکەوێتەوە، دواجار دەبێتە مایەی ترس و گومان و خۆ سەرکۆنە (لۆمە) کردن.
بۆیە بەشێوەیەک چارەسەری ئەم دۆخە ناهاوسەنگە دەرون(جوڵە و دەربڕین)ییە بە گۆڕین و ئیتر لەناودانەبونی ئەو پانتاییە ڕەمزێنراوەیە بە لەدەستچونی ئۆبێکتە ئارەزوەکەدا ناچالاکانە لەکارکەوتوە (چەقبەستنی مێژو)، لەپێناو جارێکی تر ڕەمزاندنەوەی پانتاییەکی دیکە (وەک خەساندنی نەست و ئۆبێکتی ئارەزوەکەی/هاوسەنگبونەوەی دەرونی) و بەدەستهێنانەوەی چالاکی (گەورەبونەوە وەک گەڕانەوەیەکی هەمیشەیی نیچەیی/خاوەنداری لەخۆکردن/شێربون) تێیدا وەکو جۆرێک لە گۆڕینی Lifestyle (مێژوگۆڕین) و شێوازی ژیانکردن.
* لە فەلسەفەی نیچەدا شێر هێمایە بۆ قۆناغی ئەنتی تێز وەک ڕەتکەرەوە و باڵادەستێک بەسەر تێز(وشتری ملکەچ)ەوە، منداڵبونەوەش قۆناغی سێنتێز (تێکهەڵکێشی قۆناغی وشتری ملکەچ لەگەڵ شێر)ە، بە ڕەتکردنەوەی ڕەتکردنەوەکە (نەفی نەفی/نەخێری نەخێر) وەک بەڵێیەک ڕویداوە. سەرئەنجام وەک دوکەرتبونێکی کەسایەتی لەناوخۆیدا پێکەوە.
هیوا سەعید