ئەویندار گەورەمرۆڤی زەمانی خۆیەتی
لە هەر
کات و شوێنێک ئەوین (سێنتێز) ڕویدا، ئەوە ناعەدالەتییەک لەم کات و شوێنە (کە
باڵادەستی ناڕەسەنییە بەسەر ڕەسەنی و لەناوچونی کەسایەتی و ڕودانی هاوشوناسییە وەک
بێشکۆبونێک) بەهۆی ئەوینەکەوە (بە پێزانین بە بنەڕەتی بونەوە/بە خۆناسین
ئەویترناسینەوە) پێی دەزانرێت.
بەوەدا ئامانجی ئەوینیش
بەتەنیا پێزانین و سەرڕێخستنێکە بۆ هاوسەنگکردنەوەی ئەم ناعەدالەتی و ناهاوسەنگییە
(لەشکۆدان) وەک هەڵگەڕانەوە و شۆڕشێک. بۆیە لەگەڵ بە عەدالەتبونەوەی ئەم لەشکۆدانە
ئەوینەکەش ئامانجەکەی دەپێکێت. واتا ئەو ئامانجەی دەیویست ناڕەسەن (هاوشوناسبو/بێشکۆ)
باڵادەست نەبێ بەسەر ڕەسەنەکانەوە بە نەبونکردنییان، بە دزین و بەتاڵانبردنی
کەسایەتی و بونییانەوە.
لێرەوەیە فەلسەفەکاران
(ئەویندار/پێزانەرانی بنەڕەتی بون/خاوەنشکۆ/سێنتێز) زوتر و پێشتر و بەر لە ڕودانی
(بۆ نمونە وەک هۆڵدەرلین، یان نیچە) هەستییان بە قڵپبونەوەیەکی سیاسی کۆمەڵایەتی
هێشتا هەستپێنەکراو لەکن ئەوانیترەوە کردوە، هەرواش (قڵپبونەوەکە، بە ڕۆڵ تێدا
بینینی خۆشییانەوە) ڕویداوە. وەکچۆن هیگڵ پێیوایە ئەویندار ئاگای لە تێپەڕینی
کاتە، ئەم ئاگالێبونەش ئاگاداربونە لە چۆن تێپەڕینیش. دواجار ئەم چۆنییەتی
تێپەڕینەش ئەگەر و هەڵبژاردنی تێدایە، هەتا بە چ جۆرێک و لایەکدا تێپەڕێ وەک
هەڵوێست وەرگرتن و ڕۆڵ تێدا بینینی مرۆڤ.
لەسەر ئەم بنەمایەیە بەم جۆرە
مرۆڤە ڕۆڵگێڕانە (ئەم ئەویندارانە/ئەم بەشکۆیانە/ئەم بزوێنەری گۆڕانکارییانە) وەک
گەورەمرۆڤی زەمانی خۆی دەوترێت مرۆڤی باڵا. بەوەی شێتبوە لە بلیمەتی، بەو مانایەی
لە منداڵدانی ئەویندا (سێنتێز) بە هەستکردن بە ناعەدالەتییەکی هەندەکی (ئەویش
هەوڵێکە بۆ ناڕەسەنکردن و لەشکۆخستن) شێت و لە هاوسەنگکەوتوە، کەچی دەستی لە
ئەوینەکەی (هەرچەندیش ناتوانێ لێی هەڵگرێ، بونە ڕەسەنەکەی پێ بەستراوەتەوە)
هەڵنەگرتوە، وەکئەوەی بۆ گەیاندنی پەیام و ئامانجێک بە ئەرک سپێردرا بێت.
هیوا سەعید