بۆچی سالۆمی مێردی بە نیچە نەکرد؟
خۆشمدەوێ،
ئەوەیکە خوای خۆی تەمێ دەکات.
ئەوانەی وەک ژن ژنییان خۆشدەوێ، پیاو نین!
"نیچە"
من پیاوم، مێردم ناوێت.
بۆیە لە هەموییان زۆرتر لەگەڵ ڕیلکە مامەوە، چونکە لایەنی ژنانەی لە هەموان زیاتر تێدا بو. "سالۆمی، فیلمی لۆو"
خۆتان لە ژنێک لادەن نێرانە بجوڵێتەوە، ئەگەر لانەچن بۆخۆی دەڕوات.
"نیچە"
نیچە ئەو ژنەی هەڵگری زەکەری ئایدیالی دایکە بە بەچکەپڵنگ ناوی دەبا، کە سالۆمی یەکێک بوە لەوانە، بە ئاسانی پیاوی
مێگەلی منداڵ و باڵادەستییان بەسەردا دەکات، بەوەی لەبەر گرێی ئۆدیبەوە دایکییان دەوێتەوە، ئەویش
دەزانێ چۆن بە گەڕانەوەی بۆ ویژدانی ناخودئاگا نەستییان بنوێنێتەوە.
بەڵام ئەوان داخی
ئەم جۆرە ژنە دانامرکێنن، چاوی لە
پیاوی ڕاستەقینە(مرۆڤی باڵا)یە. مرۆڤی باڵاش بەهۆی ئاکارە ناوەکییە لەخۆیەوە بۆخۆکەی (مۆڕاڵ)*، لە دەرەوەی خاوەندارییەتی (وەکئەوەی خاوەندارییەتی بەسەرخۆکردن) ناچێتە ژێر هیچ بارێکی تر. بەوەدا لێی دەبێ بە گرێی
دەرونی (دانەمرکانی زێی) و دەکەوێتە ململانێی، بۆ بچوککردنەوە و یەکسان(هاوشوناس)کردنەوەی بە
ئەوانی دیکەی مێگەلییەکان. کەچی هیچ کات ئەم هەوڵەی سەرناگرێت، لەبەرئەوەی
مرۆڤ بە کوشتنی خوا/دایکباوک (هەڵوەشاندنەوەی گرێی ئۆدیب) وەک هەڵوەشاندنەوەیەکی بەها پیرۆزەکان دەبێتە مرۆڤێکی جیاوازی باڵا، واتا ئەو
مرۆڤە بچوک و خەساوەی چێژ لە ژێردەستەیی (مازۆخیزم) و پێویستی بە دایکێکە
(لەبری باوک/ئەویتری گەورە) سۆزی پێبدا و دواجار بیخەسێنێ تێپەڕاندوە، خۆی کردۆتەوە بە
خاوەنی خۆیی و بۆخۆی ئەم باوکە خەسێنەر و ئەویتری گەورەیەی خۆیەتی.
لێرەوەیە نیچە لە زانستی
شاددا دەڵێ: "خۆشەویستی لە ڕوانگەی ژن (ئەوەی نییەتی/زێ/خەساو) و پیاو (ئەوەی هەیەتی/نێر/خەسێنەر)
جیاوازە". لەم جیاوازییەش مەبەستی لە خاوەندارییەتی و باڵادەستکردنی خەسێنەر(نێر/هۆش)ە بەسەر خەساو(مێ/سۆز)دا.
کەواتە ئەو ململانێیە
دەرونییە نەبڕاوەی (عەشق) لە نێوانی بەچکەپڵنگ و مرۆڤی باڵادا و هیچ کاتیش بە ئامانج ناگات، لە ترسی ئەوەیە بەچکەپڵنگەکە ددان بەم تێگەیشتنە نیچەییەدا بنێ و پێی ببێتە
قوربانی. وەکچۆن ژیل دۆلوز (لە ساردی و دڵڕەقی) لە شیکردنەوەی بەرهەمەکانی مازۆخدا
نمونەی ژنە کەڵەگەتە خەسێنەرەکە دێنێتەوە، ئەوکاتەی پیاوە مازۆخیستەکەی یەکەم
دەخەسێنێ، بە پەیدابونی پیاوی دوەم (پیاوی ڕاستەقینە Realman/دەرونبەرز) سڵ دەکاتەوە، نەوەکو ژنەکە
بۆخۆیشی لە بەرانبەر ئەم پیاوە ڕاستەقینەیە(باوکە)دا یەکسان ببێتەوە بە هەمان ئەو
ژێردەست و خەساوانەی بە مێبون لە بەردەم خۆیدا، بە باڵادەستی دایکانە
(دایکی زارەکی/خاوەن زەکەری ئایدیالی) هەست بە بچوکی و چێژ لە سوکایەتییەکانی
دەبینن.
لەسەر ئەو بنەمایەیە کاتێک
نیچە داوا لە سالۆمی دەکا هاوسەرگیری بکەین (بەخاوەنکردن/لەقەفەسنانی بەچکەپڵنگ) و
سالۆمیش پێی دەڵێت: "با تەنیا بە هاوڕێی یەکتری بمێنینەوە". لێرەدا بەم
وەڵام و سڵکردنەوەیە لە بەخاوەنبون هاوشێوە
دەبێتەوە بە پیاوێکی خەسێنەری خاوەندار، لەپێناو ئەوەی لە پێکەوەبوندا ژنبونە نێرانە و باڵادەستەکەی بەشێوەیەکی توندوتیژ
(سادیست/چێژکردن لە ئازاردان) بەسەر ئەوانیترە شل و نەرمە خەساوەکان (مازۆخیست/چێژکردن لە
ئازارخواردن و سوکایەتی) ئەزمون بکات.
* مۆڕاڵ ئەو ئاکارەیە لە ئاگاییەوە، بەشێوەیەکی نائاگایانە نییە بەس ئەوە بە چاک بزانێت بۆخۆی چاکە.
هیوا سەعید