ئەویتر بەهەشتیشە
دۆزەخ
ئەویترە.
"سارتەر"
ئەوەی خوازیاری دۆستێک
بێ، دەبێ ئامادە بێت شەڕیشی بۆ بکا، بۆ شەڕ هەڵایساندنیش پیاو دەبێ بتوانێ ببێ بە
دوژمن.
ئەو ئازارەی نەیکوشتم
بەهێزی کردم.
"نیچە"
دەرون و سۆبێکتێک
ئەوانیتر (ئۆبێکت/دەسەڵات) لەپێناو دەستبەسەرداگرتن و جیاوازنەبوندا تێکییانشکاند
بێ، جارێکی تریش بە نیگاکردن و فۆرم پێدانەوە (بە تێکشکاندنەکەی) وەکئەوەی
لێنەگەڕێن چاکبونەوە و تێپەڕکردنێک ڕوبدا، هەردەم نەست چالاک و ئیش لەسەر
شکاندنەوەی دەکەنەوە.
بەڵام مادام مرۆڤ
لەناوەڕۆکدا چۆن بێ، بەهۆی بەرهەمهاتنەوەی دەرونی ئەوانیتری دەرەوەش فۆرمەکەی وەها
دەبینن، واتا لە فۆرمەکەیەوە ناوەڕۆکەکەی لەلای ئەواندا ئاشکرایە، دواجار لە ژێر
چاودێری و کاریگەری نیگاکردنەکانییان وەک لە چوارچێوەدانێکی دوبارە هەمان فۆرمی پێ
دەبەخشنەوە و ناوەڕۆکی وەکخۆی بەرهەم دێننەوە، لێرەدا ئەوە خۆیەتی ئەوان ئاڕاستە
دەکات.
لەبەرئەوەی دەتوانێ بە
ئاگایی و دابڕانێکی مەعریفی (بە خۆتێپەڕکردن) سەرەتا ناوەڕۆک و لە دواتر فۆرمێکی
تر بەخۆی ببەخشێ ئاڕاستەی نیگای ئەویترەکانیش بە فۆرمەکەی بکاتەوە، بە مانای ئەو
ناوەڕۆکەی (ئەو دەرونەی) بۆخۆی پێویستییەتی بە دەستبەسەرداگرتنی نیگاکردنی ئەویترەکانەوە
وەک بون بە خاوەن دەسەڵاتێک لە بەرانبەرییاندا درێژە بە بەرهەمهاتنەکەی بدات.
لێرەوەیە بە تەنیا
نیگاکانی ئەویترەکان نابێ بە دەسەڵاتی چاودێری بۆ لە چوارچێوەدانی، بە پێچەوانەوە
ئەویش دەبێتە ئەو دەسەڵاتەی لە چوارچێوەیان بگرێتەوە. لە کۆتاییدا دەبێ بەو خۆیەی
دەیەوێ، نەک ئەوەی هەمیشە لەبەر تێکشکاندنەوەیدا بە ویستی خۆیان، بە نیگاکانییان بەرهەمی
بێنن. کەواتە ئەویتریش بەس دۆزەخ نییە، بەهەشتیشە.
لەسەر بنەمای ئەم
تێگەیشتنەیە نیچە پێیوایە ڕاستەقینەیەک بونی نییە، بەو مانایەی وەکچۆن
"ئەویتر دۆزەخە، "ئەویتر بەهەشتیشە"، سەرئەنجام
نیگاکردنەکانن (حەز/لۆژیک) بونییان هەیە. بۆیە کاتێک لەبارەی ئافراندن و
بەرهەمهێناندا لە وەهای گوت زەردەشتدا دەڵێت: "سەروترین خراپە بە سەروترین
چاکە بەستراوەتەوە، ئافرێنەریش، خۆی هەر ئەمەیە!" مەبەستی لە ئەم پێزانینەیە
بە نیگاکانی ئەویترە دۆزەخی و بەهەشتییەکان پێکەوە لەناو یەکدا (تێکهەڵکێش/سێنتێز) وەک
ئافرێنەری و بەخوابونێک. بەوەی ئەویترێک دەسەڵاتێکی تێکشکێنەر و دۆزەخێک بێ،
دروستکەر و بەهەشتێکیشە.
هیوا سەعید